काठमाडौं । शिक्षा, विज्ञान तथा प्रविधि मन्त्री सुमना श्रेष्ठले राजनीतिक दलमा आवद्ध शिक्षक पहिचानका लागि निर्वाचन आयोगको सहयोग माग्नुभएको छ ।
आज शिक्षा मन्त्रालयमा प्रमुख निर्वाचन आयुक्त दिनेश थपलियासँग भएको भेटमा उहाँले शिक्षक, कर्मचारी, प्राध्यापकहरुको राजनीतिक आवद्धता पहिचानमा सहयोग गर्न आग्रह गर्नुभएको हो ।
प्रमुख आयुक्तसँग भएको छलफलबारे मन्त्री श्रेष्ठले भन्नुभयो,‘मन्त्रालयले प्रमाण जुटाउन आवश्यक विवरण निर्वाचन आयोगबाट प्राप्त हुने अपेक्षा गरेको छौं ।’
छलफलका क्रममा प्रमुख आयुक्त थपलियाले विद्यमान कानुन, अदालतबाट भएका फैसला र अन्तर्राष्ट्रिय अभ्याससमेत हेरेर दलमा आबद्ध शिक्षक र कर्मचारीलाई कारवाही गर्न समस्या नरहेको बताएका मन्त्री श्रेष्ठको सचिवालयले जनाएको छ ।
थपलियाको भनाइ उधृत गर्दै सचिवालयका एक सदस्यले भने,‘विगतमा निर्वाचन आयोगले निर्णय नै गरेको छ र कानुन कार्यान्वयन गराउन निर्वाचन आयोगको सहयोग रहन्छ ।’
